Sumqayıt şəhərində 1980-ci il təvəllüdlü Vüsal bacısı Nigara (adlar şərti verilib – red.) xəsarət yetirib. 
Sumqayit.tv-in əldə etdiyi məlumata görə, Vüsalın barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. 

Cinayət işi üzrə təqsirləndirilən şəxs qismində ifadə verən Vüsal ona elan olunmuş ittiham üzrə özünü təqsirli bilib. O bildirib ki,  2010-cu ildə bacısı Nigar boşanaraq yaşadıqları ata evinə gəlib: “Gəldiyi gündən aramızda mübahisələr yarandı. Mübahisə zamanı Nigar məni nalayiq ifadələrlə təhqir etdi. Sonuncu dəfə saat 15 radələrində bacım evə gəldi. Həmin vaxt mən bacımın yatdığı yataq dəstində uzandım. Bunu görən bacım mənə bununla bağlı irad tutdu. Bu zaman bacıma eyni hərəkətlərin onun da etdiyini söylədim. Bacım məni təhqir etməyə başladı. Daha sonra bacım evdə səs-küy salmağa başladı, evdə olan şkafın şüşəsini sındırdıqda mən də şillə ilə onun sifətinin sol yan nahiyyəsindən vurdum”. 

İş üzrə zərərçəkmiş Nigarın sözlərinə görə, 2010-cu ildə həyat yoldaşından boşandıqdan sonra atasının evində atası, qardaşı və oğlu ilə birlikdə yaşamağa başlayıblar: “Boşandığım gündən qardaşım ilə aramızda mübahisələrimiz olub. Mübahisənin səbəbi kimi ata evinə gəldikdən sonra qardaşımın mənə evdə payım olmadığını söyləməsi, hər dəfə bu səbəbdən mənə nalayiq ifadələr işlətməsi olub. Sonuncu dəfə hadisə günü həkimdən evə gəldikdə qardaşımın yerimdə uzandığını gördüm. Qardaşımdan yerimdə uzanmamasını, yerimi çirkləndirməməsini tələb etdim. Bunu dedikdə qardaşım məni nalayiq ifadələrlə təhqir etdi və mübahisə yaratdı. Mübahisə zamanı şillə ilə sifətimin sol yan hissəsindən vurdu”. 

Bu cinayət işinə Sumqayıt Şəhər Məhkəməsində baxılıb. Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. Bu səbəbdən Vüsalın barəsində olan cinayət təqibinə xitam verilib. O, cinayət məsuliyyətindən azad edilib. 
Demokrat.az