Sumqayıt şəhərində yaşayan Hüseynova Gülnaz Həsən qızı tərəfindən Hurriyyet.az saytının redaksiyasına şikayət məktubu daxil olub. Xanım şikayətçi iddia edir ki, “Kapital Bank” onu aldadaraq 20 min manatlıq borc sənədəinə qol çəkdirib:
"Mən, Hüseynova Gülnaz Həsən qızı, yazaraq bildirirəm ki, rütbəcə polkovnik olan hərbçi həyat yoldaşım rəhmətə gedəndən sonra ondan qalan pensiyamı "Kapital Bank" qarşı saxtakarlıq edərək mənimsəyir.
Bildirim ki, 30.11.2018-ci ildə oğlum Hüseynov Feyzi Alı oğlu ilə “Kapital Bank” ASC arasında  kredit müqaviləsi bağlanmışdır. Bundan sonra oğlum bir müddət kredit öhdəliklərini yerinə yetirmiş və sonradan həbs olunduğu üçün ödənişləri məcburən dayandırmışdır.
Oğlum həbs ediləndən sonra “Kapital Bank” ASC-dən mənə zəng olundu. Dedilər ki, oğlumun adına olan borc ödənilməsə, işi daha da ağırlaşacaq. Bu səbəbdən də oğlumun adına olan borcun mənim adıma keçməsinə razılıq verdim. Amma borcun məbləğindən xəbərim olmadı. Belə ki, mənə oğlum adına 2 min manat kredit borcu qaldığı bildirilmişdi. Daha sonra məlum oldu ki, bank əməkdaşları yaşımdan və xəstəliklərimdən istifadə edərək, aldadıblar. Əlbəttə, mən oğlumun işinin ağırlaşmamsı üçün onun adına olan 2 min manatlıq kredit borcunu ödəməyə razılaşmışdım. Sonra biləndə ki, oğlumun adına olan borc 20 min manata yaxındır, artıq gec idi, çünki sənədə oxumadan qol çəkmişdim".
Gülnaz Hüseynovanın sözlərinə görə, oğlu 30.11.2018-ci ildə "Kapital Bank"dan ümumilikdə 19730 manat kredit götürüb. Təxminən 22 ay ödəniş edildikdən sonra o, həbs edilmiş və nəticədə bank qarşısında öhdəliyini yerinə yetirə bilməmişdir. Bu səbəbdən də, faiz borcları artmış və bu müddət ərzində ödənilən pullar cərimə kimi silinib və o, təxminən 2 il sonra yenidən banka 19730 manat ödənilməsi ilə bağlı öhdəliyə imza atıb: "Həyat yoldaşım vəfat edib, qızımın yoldaşı rəhmətə gedib, uşaqlara mən baxıram. Bundan əlavə, həbs olunan oğlumun da ailəsi mənim üstümdədir. Mən sizin sayt vasitəsilə “Kapital Bank” rəhbərliyindən xahiş edirəm ki, 30.11.2018-ci ildə oğlumla bank arasında olan müqavilə təsdiq edilsin, mənim adıma olan borc müqaviləsi isə ləğv edilsin.
Məsələ ilə bağlı bir dəfə məhkəməyə müraciət etmişəm, 2-ci dəfə də müraciət etməyi düşünürəm. Oğlumun adına olan borcu ödəmək üçün hər ay kartımdan 500 manata yaxın pul tutulur. Xəstə adamam, iynə-dərmanlarım, üzərimdə olan öhdəliklərim var. Həmin pulu ödəməkdə çətinlik çəkirəm".
Məsələ ilə bağlı “Kapital Bank” mövqeyini dərc etmək istəsək də, əlaqə saxlaya bilmədik.

Jalə FAMİLQIZI
Redaksiyadan: Qarşı tərəfin mövqeyini dərc etməyə hazırıq.