Sumqayıt şəhərində 1998-ci il təvəllüdlü Əfqan şəxsi münasibətlər zəminində yaranan mübahisə zamanı qeyri-rəsmi münasibətdə olduğu Arifəyə (adlar şərti göstərilib – red.) xəsarət yetirib. 
Sumqayit.tv xəbər veri ki, Demokrat.az-ın əldə etdiyi məlumata görə, Əfqan qeyri-rəsmi münasibətdə olduğu Arifə ilə arasında qısqanclıq zəminində mübahisə baş verib. Mübahisə zamanı Arifənin saçından tutaraq başını aşağı əyməklə sol almacıq nahiyəsinə dizi ilə qəsdən güclü zərbə vurub. 

Hadisəni törədən Əfqanın barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. 

Cinayət işi üzrə təqsirləndirilən şəxs qismində ifadə verən Əfqan ona elan olunmuş ittiham üzrə özünü təqsirli bilib. O bildirib ki, Arifə ilə 2019-cu ildə qeyri-rəsmi şəkildə birgə yaşayırlar və övladları yoxdur:

“Bzim münasibətlərimiz yarandığı gündən Arifə ilə eyni evdə yaşamışıq. Münasibətlərimiz normal olub. Lakin ara-sıra mübahisələr etmişik. Mübahisələrimizin əsas səbəbi qısqanclıq olub”.

Təqsirləndirilən şəxs qeyd edib ki, hadisə günü, gecə saat təxminən 04.00-da Arifə ilə birlikdə yaşadığı evdə olarkən yenidən mübahisələri yaranıb: “Mübahisə əvvəlki kimi qısqanclıq zəminində baş verdi. Bu zaman Arifə yüksək səslə və kobud formada danışmağa başladı. Ona səsini qaldırmamasını və normal danışmasını desəm də, buna əhəmiyyət vermədən öz hərəkətinə davam etdi. Əsəbləşdim və aramızda mübahisə yarandı. Mübahisə zamanı Arifənin saçından tutaraq sağ dizim ilə onun sifətinin sol gözaltı nahiyyəsinə bir dəfə zərbə vurdum. Daha sonra mübahisəmiz daha da böyüməsin deyə evdən getdim”. 

İş üzrə zərərçəkmiş Arifənin sözlərinə görə, təqsirləndirilən Əfqan onun əvvəllər qeyri-rəsmi birgə münasibətdə olduğu şəxsdir: “Biz münasibət quraraq yaşamışıq. Əfqanın mənim evimə daimi gediş-gəlişi olub. Lakin son vaxtlarda narkotik maddələrə meyilli olması və narkotik vasitə istifadə etməsinə görə münasibətlərimiz kəsildi. Ondan bir daha məni narahat etməməsini tələb etdim. Buna baxmayaraq Əfqan mütəmadi olaraq məni narahat etməyə, evimə gəlməyə davam etdi. Normal sözlə başa düşmədiyindən və səs-küy yaratmağa meyilli olduğundan hər dəfə gəldiyində onu söhbət etmək üçün evə dəvət etmişəm”.

Zərərçəkmiş qeyd edib ki, hadisə günü, gecə saat 03.30-da yaşadığı mənzilin qapısının döyüldüyünü eşidib: “Qapını döyənin Əfqan olduğunu anladım. Səs-küy salacağından ehtiyatlanaraq dərhal qapıya yaxınlaşdım. Ondan gecə vaxtı niyə gəldiyini soruşdum. O, vacib sözü olduğunu, qapını açmağımı istədi. Qapını açmasam, biabırçılıq yaradacağını bildiyimə görə qapını açdım. Mənzilə daxil oldu və məndən evdə kimin olduğunu soruşdu. Əfqanın evə qısqanclıq zəminində gəldiyini başa düşdüm. Guya mənim evə kimisə gətirməyimdən şübhələnib. Onun bu fikrə düşməsi məni özümdən çıxardı. Aramızda  mübahisə yarandı. Mübahisə zəminində Əfqan saçımdan tutaraq aşağı əydi, dizi ilə sol almacıq nahiyəmə  güclü zərbə vurdu. Zərbədən özümü itirərək yerə yıxıldım. Polisə zəng vuracağımı dedikdən sonra Əfqan mənzili tərk etdi”.

Bu cinayət işinə Sumqayıt Şəhər Məhkəməsində baxılıb. Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. Bu səbəbdən Əfqanın barəsində olan cinayət təqibinə xitam verilib. O, cinayət məsuliyyətindən azad edilib. 

Qeyd edək ki, Əfqan bundan əvvəl də məhkumluq həyatı yaşayıb. O, Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri xeyli miqdarda əldə etmə, saxlama, hazırlama, emal etmə, daşıma) maddəsi ilə təqsirli bilinib. O, 2 il 26 gün müddətə azadlığın məhdudlaşdırılması cəzasına məhkum edilib.