Bu gün Azərbaycan dilindən fərqli dillərdə tədris aparılan ümumi təhsil müəssisələrinin 9 və 11-ci sinif şagirdləri üçün buraxılış imtahanı çərçivəsində Azərbaycan dili (dövlət dili kimi) imtahanı keçirilib.

Sumqayit.tv xəbər verir ki, imtahan eyni zamanda ali və orta ixtisas təhsili müəssisələrinə qəbul imtahanını digər dillərdə verən əvvəlki illərin məzunları üçün də təşkil olunub.

Dövlət İmtahan Mərkəzindən verilən məlumata görə, imtahan ölkə üzrə 21 şəhər və rayonda, 129 binada keçirilib.

İmtahanda sağlamlıq imkanları məhdud 55 nəfər şagird də iştirak edib. Onların rahat şəkildə imtahan verməsi üçün xüsusi zallar ayrılıb və zəruri şərait yaradılıb.

İmtahanın keçirilməsi üçün ümumilikdə minlərlə nəzarətçi və texniki heyət cəlb olunub.

İlkin məlumata əsasən, imtahan zamanı bir nəfərdə qayda pozuntusu aşkarlanıb – onun ayaqqabısında gizlədilmiş mobil telefon tapılıb. Faktla bağlı araşdırma aparılır.

Qeyd edək ki, cari il məzunları üçün maksimal bal 100-dür və nəticə attestata yazılacaq. Qəbul imtahanında iştirak edənlər üçün isə 50 və daha yuxarı bal “məqbul” hesab olunur.

İmtahan nəticələrinin 2 həftə ərzində elan olunması gözlənilir.

3-05-2026, 12:42 257